ആദികവിയായ വാല്മീകിമഹർഷിയാൽ വിരചിതമായ രാമായണം സഹസ്രാബ്ദങ്ങൾ കഴിഞ്ഞിട്ടും മനുഷ്യമനസ്സിനെ സ്വാധീനിക്കുന്നു. ഒരു പ്രാവശ്യമെങ്കിലും വായിക്കാൻ, ഒരിക്കൽ വായിച്ചത് വീണ്ടും വീണ്ടും വായിക്കാൻ അടങ്ങാത്ത ഒരാഗ്രഹം. മറ്റു സാഹിത്യ സാംസ്കാരിക ഗ്രന്ഥങ്ങളെ ദൃശ്യ-ശ്രാവ്യ മാധ്യമസ്വാധീനം ഒന്നുലച്ചപ്പോഴും ഈ വടവൃക്ഷം ശിരസ്സുയർത്തിത്തന്നെ നിൽക്കുന്നു. പ്രായമായവരും യുവജനങ്ങളും വാല്മീകി രാമായണം പാരായണം ചെയ്യുന്നു. ബാലികാബാലന്മാർക്ക് രാമായണത്തെക്കുറിച്ച് ഒരുഏകദേശരൂപം നൽകാൻ രാമായണ പ്രശ്നോത്തരിക്ക് കഴിയും. ഓരോ കാണ്ഡം തിരിച്ച്, ചെറിയ ചോദ്യോത്തരങ്ങളിലൂടെ ശ്രീ സുധീർ നിരേറ്റുപുറം ഈ കൃത്യം നിർവഹിച്ചിരിക്കുന്നു. ഭക്തിയോടൊപ്പം അറിയാനുള്ള വാസനയും വളർത്താൻ സഹായിക്കുന്നതാണ് രാമായണ പ്രശ്നോത്തരി